डिजिटल युगमा नयाँ सोच, नयाँ प्रयास — घोडदेवी न्यूज डटकम

सूचना र प्रविधिको तीव्र विकाससँगै संसार डिजिटल माध्यममा जोडिँदै गएको छ। समाचार तथा सूचना प्राप्त गर्ने पाठकको शैली पनि परिवर्तन भइरहेको वर्तमान समयमा हामीले पनि नयाँ सोच र उद्देश्यका साथ घोडदेवी न्यूज डटकम सञ्चालनमा ल्याएका छौँ। पाठकसमक्ष ताजा, सत्य, तथ्यपरक र विश्वसनीय समाचार तथा सूचना समयमै पुर्‍याउने मुख्य उद्देश्यका साथ घोडदेवी न्यूज डटकमको सुरुवात गरिएको हो। समाजमा भइरहेका गतिविधि, जनसरोकारका विषय, स्थानीय समाचार, विकास निर्माण, सामाजिक गतिविधि, राजनीति, अर्थतन्त्र, शिक्षा, स्वास्थ्य, खेलकुद, कला–संस्कृति तथा मनोरञ्जनलगायत विविध क्षेत्रका समाचारलाई पाठकसमक्ष पुर्‍याउने हाम्रो प्रयास रहनेछ। हामीले यस अनलाइन सञ्चारमाध्यमको नाम प्रसिद्ध धार्मिक स्थल घोडदेवीको नामबाट राखेका छौँ। घोडदेवीसँग जोडिएको धार्मिक तथा सांस्कृतिक पहिचानलाई सम्मान गर्दै यसको नामलाई डिजिटल सञ्चारको माध्यमबाट अझ व्यापक रूपमा चिनाउने हाम्रो प्रयास पनि रहनेछ।
सत्य र विश्वसनीयता हाम्रो प्राथमिकता
पत्रकारितामा पाठकको विश्वास सबैभन्दा महत्वपूर्ण हुन्छ। त्यसैले घोडदेवी न्यूज डटकमले ‘पहिले सत्य, त्यसपछि समाचार’ भन्ने भावनालाई आत्मसात् गर्दै समाचार सम्प्रेषण गर्नेछ। हामी कुनै पनि समाचारलाई प्रकाशित गर्नुअघि तथ्यको यथासम्भव पुष्टि गर्ने, सम्बन्धित पक्षको भनाइलाई स्थान दिने र पाठकलाई भ्रमित नहुने गरी समाचार प्रस्तुत गर्ने प्रयास गर्नेछौँ। समाचारमा आउने त्रुटिलाई सच्याउँदै निरन्तर सुधारको बाटोमा अघि बढ्नु हाम्रो जिम्मेवारी हुनेछ। हाम्रो उद्देश्य केवल समाचार दिनु मात्र होइन, समाजको आवाज बन्नु पनि हो। गाउँ–बस्तीका समस्या, नागरिकका गुनासा, स्थानीय तहका गतिविधि, विकासका सम्भावना तथा समाजमा भइरहेका सकारात्मक कामलाई उजागर गर्दै सम्बन्धित निकायको ध्यानाकर्षण गराउने भूमिका निर्वाह गर्ने हाम्रो प्रयास रहनेछ। 
पाठक नै हाम्रो शक्ति
घोडदेवी न्यूज डटकमको यात्रा पाठकको विश्वास, सुझाव र साथबिना पूर्ण हुन सक्दैन। त्यसैले हामी हाम्रा पाठकलाई  समाचारका उपभोक्ता नभई हाम्रो यात्राका सहयात्रीका रूपमा लिन्छौँ। तपाईंका सुझाव, प्रतिक्रिया, आलोचना र रचनात्मक सहयोगलाई हामी सदैव सम्मान गर्नेछौँ। पाठकको विश्वासलाई कायम राख्दै समयसापेक्ष, जिम्मेवार र जनउत्तरदायी पत्रकारिताको अभ्यास गर्ने हाम्रो प्रतिबद्धता रहनेछ। डिजिटल सञ्चारको क्षेत्रमा हाम्रो यो नयाँ यात्रामा तपाईंहरूको साथ, सहयोग र विश्वासको अपेक्षा गरेका छौँ।
घोडदेवी न्यूज डटकम — ताजा सूचना, सत्य समाचार र विश्वसनीय आवाज।
तपाईंको विश्वास, हाम्रो जिम्मेवारी।